Бодом
Prunus amygdalus Batsch

Identifier

CSTR: UZ113.45.PL.Prunus.amygdalus.IBUz.00039

Ўсимлик тавсифи. 

Бодом Rosaceae оиласига мансуб 6-10 м баландликдаги дарахт. Новдалари силлиқ қизил-жигарранг пўстлоғи билан, эски шохларнинг пўстлоғи кулранг-қўнғирранг, деярли қора рангга эга. Ёнбаргчалар бигизсимон, майда, эрта тукиладиган. Барглари кетма-кет, қисқарган шохларда, тутам бўлиб жойлашган, бандли, узунлиги 4-6 см, силлиқ, ланцетсимон ёки чўзинчоқ-эллипссимон. Барглардан олдин гуллайдиган гуллари якка бўлиб, ўтган йилги новдаларда ривожланади; тожибарглари оқ ёки оч пушти рангга эга.
Мевалари 3-3,5 см узунликдаги, қийшайган ёки чўзинчоқ-тухумсимон қуруқ данак. Бодом февраль-апрель ойларида гуллайди, мевалари июль-август ойларида етилади. Тиббий амалиётда бодом ёнғоқлари ишлатилади. Эмульсия ва бодом мойи ширин бодом уруғидан олинади, аччиқ бодом уруғи эса аччиқ бодом сувини тайёрлаш учун ишлатилади.

Ўсиш жойи. Тарқалиши.

 Республикада ёввойи ҳолда ўсадиган бодомнинг бир неча турлари мавжуд. Бир тури саноат аҳамиятига эга – оддий бодом. Ёввойи ҳолда у Ғарбий Тиён-Шоннинг катта майдонларида ўсади. Бодом қадимдан, асосан, Ўрта Осиё республикаларида етиштирилган.
Бодом иссиқсевар, аммо эрта гуллайдиган турлари – 20° C дан паст совуққа ва қобиқ билан ўралган куртаклари – 32-35°С дан паст ҳароратга ҳам чидамли. Кўплаб мевали экинлар билан таққослаганда, бодом ёруғликка талабчан, аммо тупроқ типи ва унинг унумдорлиги нисбатан аҳамиятли эмас. У шағалли, лойли тупроқларда, қоратупроқда, шунингдек, маълум даражада оҳак бўлган тупроқларда, лекин ер ости сувлари 2-3 м га яқин бўлмаган ва яхши дренажли жойларда яхши ўсади ва мевалайди. Бодом тупроқни аэрациясига жуда талабчан. У ғовак, қуруқ, енгил тупроқларни афзал кўради. Уни тоғ қияликларида экиш тавсия қилинади.
Бодом дарахтининг икки – еб бўлмайдиган аччиқ мевали ва ейиш мумкин бўлган ширин мевали хиллари ажратилади. Аччиқ бодом асосан унга ширин турини пайвандлаш ва аччиқ бодом ёғини олиш учун ишлатилади. Бодом асосан пайвандлаш йўли билан одатда куртаклаш орқали кўпайтирилади. Бунинг учун материал ноябрь-январь ойларида уруғларни стратификациясиз экиш орқали олинади. Кузда октябрь охиридан бошлаб кўчатларни экиш тавсия қилинади.

Хом ашёни йиғиш ва унинг сифати.

Йиғилган, тозаланган ва сараланган ёнғоқлар 3-4 кун давомида қуёшда қуритилади. Бунинг учун улар бир қатлам қилиб ёғоч товоқлар устига ёйилади, ҳар куни аралаштирилади. Қуритилган ёнғоқлар ҳаво яхши айланадиган қуруқ хонада, омборларда қутиларда ва дорихоналарда банкаларда ёки тунука идишларда сақланади. Ширин бодом уруғлари ёқимли, ширин, мойли таъми бўлиб, ҳидга эга эмас. Улар бутун, синган жойи оқ рангда, тахир мазасиз ва ҳидсиз бўлиши керак. Тўйинган сульфат кислота билан аралашмадаги қизил ранги ва уруғларини сув билан майдаланганда бензальдегиднинг ўзига хос ҳидига эга аччиқ бодом бўлмаслиги керак.

Кимёвий таркиби.

Бодом уруғининг асосий таркибий қисмлари ёғли мой (24-69%) ва хом протеин (14,7-35,0%) бўлиб, уруғ массасининг 80-90 фоизини ташкил қилади. Уруғида ёғдан ташқари амигдалин гликозиди, гематин, B витаминини учрайди. Бодом уруғининг оқсил таркиби учта таркибдан иборат: альбумин, глобулинлар ва глютеолинлар. Бодом оқсилларида ўсимлик оқсилларида мавжуд бўлган барча аминокислоталар мавжуд.

Тиббиётда қўлланилиши.

Ширин бодом уруғи эмульсияси ва аччиқ бодом уруғидан олинган аччиқ бодом суви ошқозон ва ичакдаги оғриқларга ишлатилади. Бодом ёғи ташқи томондан терини юмшатиш учун, ичга ичилганда юмшоқ ич сурувчи сифатида ишлатилади. Уруғнинг кунжараси (бодом кепаги) косметикада юзнинг терисини юмшатиш ва тозалаш воситаси сифатида ишлатилади. Фармацевтика амалиётида бодом ёғи суюқ мойлар учун асос ва эмульгатор сифатида ишлатилади. Ширин бодомнинг мевалари халқ табобатида гастрит, ошқозон ва ўн икки бармоқли ичак яраларини даволашда кенг қўлланилади. Бодом ёнғоғининг қобиғидан газ ютувчи кўмир тайёрланади. Аччиқ бодом уруғлари заҳарли ҳисобланади. Унинг заҳарли таъсири таркибидаги амигдалин гликозидига боғлиқ. Заҳарланган инсонда кўп сўлак оқиши, кўнгил айниши, қусиш, бош оғриғи, нафас қисилиши, пульснинг секинлашиши, қорачиқнинг кенгайиши, умумий ҳолсизлик, тортишиш, оғир ҳолатларда – ўлим билан якунланадиган нафас тўхташи кузатилади.

Фойдаланилган адабиетлар рўйхати:
1. Акопов И.Э. Важнейшие отечественные лекарственные растения и их применение. – Ташкент: Медицина, 1990. – 446 с.
2. Алимбаева П.К., Гончарова А.В. Дикорастущие лекарственные растения Киргизии. – Фрунзе: Илим, 1971. – 38 с.
3. Атлас ареалов и ресурсов лекарственных растений. – М.: ГУГК, 1983. – 340 с.
4. Биологические особенности и распространение перспективных лекарственных растений //Под редакцией Т.А. Адылова. – Ташкент: Фан, 1981. –158 с.
5. Биологически активные вещества растительного происхождения. Б.Н.Головкин, Р.Н.Руденская, И.А.Трофимова, А.И.Шретер – в 3 томах. М.: Изд-во Наука, 2001. –764 с.
6. Борисова Н.А., Шретер А.И. К методике определения запасов и картирования ресурсов лекарственного растительного сырья // Раст. ресурсы. – Ленинград: Наука, 1966.– Т. 2. – Вып. 2. – C. 271-277.
7. Ботанико-фармакогностический словарь // Под ред. Блиновой К.Ф. – М.: Высшая школа, 1990. – 272 с.
8. Гаммерман А.Ф., Кадаев Г.Н., Янценко-Хмелевич А.А. Лекарственные растения (растения-целители). – М.: Высшая школа, 1984. – 400 с.
9. Гесь Д.К., Горбач Н.В. Лекарственные растения и их применение. – Минск: Наука и техника, 1977. – 552 с.
10. Государственная Фармакопея СССР // 11-е изд. – М.: Медицина, 1989. – 398 с.
11. Государственный реестр лекарственных средств. Официальное издание: в 2 т.- М.: Медицинский совет, 2009. – Т.2, ч.1 – 568 с.; ч.2 – 560 с.
12. Растительные лекарственные средства Абу Али ибн Сино (Авицены). Справочник // Под редакцией Ш.Б.Иргашева. – Ташкент: Абу Али ибн Сино, 2003. – 457 с.
13. Хожиматов К.Х., Хожиматов О.К., Собиров У.А. Сборник правил пользования объектами лекарственных, пищевых и технических растений. Ташкент: «Янги аср авлоди», 2009. – 171 с.
14. Энциклопедический справочник. Лечение растениями. — М.: «Издательский дом «АНС», 2005. – 1024 с.
15. Davidson A., Jaine T. The Oxford Companion to Food. – Oxford University: Press, 2014.
16. www.ipni.org
17. https://www.greeninfo.ru
18. http://lektrava.ru
19. http://manual-plants.com.ua/section/opisanie-rasteniy
20. http://pharmspravka.ru
21. http://www.fito.nnov.ru
22. http://n-retsept.ru
23. www.plantarium.ru
24. http://www.theplantlist.org/
25. http://www.u-lekar.ru/
26. http://100trav.su/
27. https://mag.org.ua/rast/trava1296.html
28. https://dic.academic.ru/dic.nsf/ruwiki/16267
29. https://kiberis.ru/?p=4653

Khojimatov et al, 2024. Prunus amygdalus Batsch Бодом
https://cstr.cn/UZ113.45.PL.Prunus.amygdalus.IBUz.00039